Turmush — Баткен районундагы Төрт-Гүл суу сактагычына 89.5 млн метр куб суу толду. Бул тууралуу бүгүн, 17-мартта Баткен райондук суу чарба башкармалыгынан билдиришти.
Маалыматка караганда, учурда суу сактагычтан суу сугатка бериле элек. Бирок жазгы ным топтоого берилип турат.
Ошондой эле райондогу «Р6» каналында оңдоо иштери уланууда. Куруучулар 15-апрелге чейин курулуштун биринчи этабын бүтүрүүнү пландап жатышат. Аталган канал суу сактагычтан келген сууну, 2600 гектар жерге жеткирет.
Тактама:
Төрт-Гүл суу сактагычынын аянты 6,6 км квадратты, суунун сыйымдуулук көлөмү 90 млн метр кубду түзөт. Суу сактагычка суулар мөңгүлөрдүн, карлардын эриши жана башка булактар менен топтолот. Жыл сайын сугат учурунда 60 млн метр куб суу колдонулат. Запаста 30 млн метр кубга жакын суу калат.
Суу сактагыч 1970-жылдары курулган. Анын натыйжасында көптөгөн жүзүм, алма, өрүк бактары, гектарлаган жерлер өздөштүрүлгөн. Аны менен катар Баткен районунда жаңы айылдар пайда болгон.
Төрт-Гүл суу сактагычы Баткен шаарынан сырткары 6 айыл өкмөттү сугат суу менен камсыз кылат. Тактап айтканда 11 миң гектар жерди суу менен камсыздайт. Бул объект облус үчүн гана эмес, жалпы республика үчүн стратегиялык мааниге ээ.
2025-жылдын апрель айынын башында Төрт-Гүл суу сактагычында суунун көлөмү 89,251 млн метр кубду түзгөн. Бул тууралуу Баткен райондук суу чарба башкармалыгынын башчысы СултанбайЭрматов билдирген.
Андан кийин 2025-жылдын июнь айында Төрт-Гүл суу сактагычында 44 миллион куб метр суу бар экени кабарланган.
«Баткен районунун негизги суу артериясы болуп эсептелген Төрт-Гүл суу сактагычында 1-июндан тарта күнүнө 3 миллион куб метр суу топтоло баштады. Мунун негизинде район аймагындагы 9980 гектар сугат аянтты суу менен камсыздоодо быйыл эч кандай көйгөй болбойт», - деген Эрматов.