Turmush — Ноокат районунун Кара-Таш айыл аймагынын тургуну, көп жылдан бери Россия Федерациясында жеке ишкерлик менен алектенип жүргөн Шавкат Закиров апасынын урматына курулган «Бүрабия эне» бала бакчасын айыл өкмөттүн балансына өткөрүп берди.
Эки кабаттан турган 120 орундуу бала бакчанын ачылышы кечээ, 25-августта болуп өттү.
Бала бакчада заманбап шарттар каралып, керектүү жабдыктар менен камсыздалган. Ошондой эле, балдар ойноочу сырткы аянтчанын аянты да кенен курулган.
Ачылыш аземине ЖК депутаты Жусуп Коргонбай уулу, аким Данир Иманалиев баштаган жергиликтүү бийликтин өкүлдөрү, агартуучулар жана айыл тургундары катышты.
Жогорку Кеңештин мурунку депутаты Төрөбай Зулпукаров өз сөзүндө апасынын урматына курулган бала бакча жалпы Зулпукаровдордун үй-бүлөсүнүн атынан өкмөткө белек болгонун айтып өттү.
«Азыркы бала бакчанын ордунда союз убагында сарай болгон. Андан кийин дарыгерлер борбору болду. Кийин каралбай калганда апам бала бакчага айландырган эле.
Учурда өзүбүз көрүп жаткандай, өлкөдө социалдык объектилердин курулушу кызуу жүрүүдө. Ошонун катарында бул бала бакча дагы аз болсо да мамлекетке салым деп эсептейм», - деди Төрөбай Зулпукаров.
Сөзгө чыккан коноктор Шавкат Закиров жана Төрөбай Зулпукаровго ыраазычылыктарын билдирип, алардын апасы тууралуу жылуу эскерүүлөр айтылды.
Бүрабия Нурматова 1968-жылы Эски Ноокат айылдык кеңешинде катчы болуп иштеген. Андан кийин Калинин орто мектебинде китепканада эмгектенген. Чапаев колхозунда бригадир болгон. 1991-жылы колхоз жоюлуп, дыйкан чарбалар түзүлүп жаткан мезгилде «Калыс» жамааттык дыйкан чарбасын жетектеген.
Бүрабия Нурматова коомдук-саясий иштерге катышып, аялдардын активдүүлүгүн Эгемендүүлүктүн алгачкы жылдарында көргөзө алган. Бул жылдары бир нече бала бакчалар жабылып, каржылоого, уюштурууга мүмкүнчүлүгү жок учурда Кара-Таш айылында бала бакчасын түптөп, тамак- ашты өз үйүнөн алып келип, андан ары иштеп кетүүсүнө аракет кылган.
