Бөлүмдөр
Бейшемби, 18-октябрь
Ош облусуНоокат району 24.07.2018 10:14 Жаңыланды: 24.07.2018 14:08

Айыл турмушу: Айылдан дүйнө чемпиондорун чыгарууну көздөгөн ага-ини бош имаратты спорт залга айлантышты (сүрөт)

Turmush -  Айылдан дүйнө чемпиондорун чыгарууну көздөгөн ага-инилер жаш экенине карабай чоң жоопкерчиликти мойнуна алышкан. Ноокат районунун Кара-Таш айылында жашаган Азамат Эрдөөлөт уулу менен Талант Эржигит уулу учурда эркин күрөш боюнча 5 жаштан 18 жашка чейинки балдарды машыктырып жатышат.

Буга чейин айылдагы залдар бош турса, алар Азаматтын идеясы менен машыгуу залына айланган.

«Айылга машыгуу залын ачып, балдарды машыктыруу идеясы Россияда окуп жүргөндө пайда болду. Өзүм Санкт-Петербург шаарынын эркин күрөш боюнча курама командасында машыгып жүрдүм. Биздин убакта балдар мектептен чыгып алып көчөдө ойноп, же талаа иштерин кылчу элек. Заман талабына ылайык жаш балдарды бош койбош керек деген ой менен 2015-жылы мектептин залына күрөш килемдерин алып, балдарды машыктыра баштадык. Алгач матрацтар жетпегендиктен 20 гана баланы кабыл алганбыз», - деди Азамат Эрдөөлөт уулу.

Убакыттын өтүшү менен айылдык кеңештин депутаттары, айыл өкмөт жыл сайын акча бөлүп отуруп, залды толтуруп беришкен. Учурдагы машыктыруучу Таланттын айтуусунда, алгач айылдагы балдардан залга эч ким келбей коёбу деп да кооптонушкан.

«Залды агам экөөбүз актап-сырдап, оңдоп чыктык. Ачып алган соң тез эле жабылып калбайлы деген намыс менен катуу иштедик. Үлгүнү өзүбүздөн баштадык. Бир күн да машыгууну калтырбай, билгенибизди үйрөтүп, ата-энелердин да, балдардын да ишеничине кирдик. Айына 200 сом болгону менен айыл жергесинде бул чоң акча, бирок машыгуу күнүнө болот. Жаз, күз мезгилдеринде балдар азаят. Иш күчөгөн убакта машыгууну түнкүгө жылдырабыз», - деди Талант Эржигит уулу.

Залга кошуна Кыргыз-Ата, Жаңы-Ноокат айылдарынан да балдар келишет. Анда учурда 100 бала машыгып жатат. Ал эми ал залда машыккан балдар райондон баштап, Азия биринчиликтерине чейин жетип, байгелүү орундарды камсыз кылууда. Чет жакка чыккан балдарга айыл өкмөт, айылдын патриот мырзалары жардам берип турушат.

«Жаш балдар чындап кубанат. Жеңиш стимул болуп, өмүр бою жүрөктөрүндө калат. Жеңилсе сооротуп, психолог катары да иштешесиң. Сыртыбыздан байкатпаганыбыз менен балдардын эмоциясы бизден да өтөт. Алар жеңгенде жүрөгүңдөн өзүң менен сыймыктануу, өзүңө ыраазы болуу сезимдери өтөт. Балдардын алгачкы машыктыруучусу катары эсинде калабыз. Алардын ар биринен дүйнө чемпионун көрөбүз», - дешет ага-инилер.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×